مبروك ياللي حزت شوط الإثارة

شوط التحد­­ي في ميدان الإمارات

يا بدر ابن صالح تراها بشاره

يا ابن الوهيبي دونت بالملفات

مبروك فوزك يوم يصدر قراره

بالمركز الأول أخذت العلامات

في شوط ما هو بس شوط الشطارة

شوط التحدي في سباق الأصيلات

هجن الشيوخ اللي ثقيل عياره

ما يدخله غير السبوق العريبات

خظت بقعود من سلايل نداره

حرن شريته ما حسبت الخسارات

اشعل وخالط بالوبر مع شقاره

راهي ومثله يوم يركض قليلات

هو زعفران اللي عطوه الإشاره

ثم استعد وصوتو له بالأًصوات

ثارن وثار ولا نوي باستداره

عطاك عمره ما حسب للمسافات

وقت السبق يركض بعزم وجساره

متعلمن راعيه رقي المنصات

له موقع دايم يجي بالصداره

يجيب الأول لو خصومه قويات

سلاله كحيلان أصل انحداره

وعز الجمل راع السبق والبطولات

وبوه شاهين البطل باشتهاره

والكاسبيه جابته عقب صولات

ولميلم اللي شار نعم الإشارة

الشمري راع النضر للسبوقات

اللي عطاك امره وتم اختياره

له نضرت بالطيبه والسليلات

وما هو قصور بك ولا هي احتقاره

من يستشير الغير يلقى المشورات

خنجر ذهب زايد يهد فخاره

للمملكة جبته وجبت المسرات

تباشر القصمان وسط الامارة

هناك فيصل ما تشوف المهونات

وسلطان ابن محمد راع الضفارة

هناك في فوزك وهذي شهادات

وغنت له بريده وقالت عباره

انت الذي البس لك الزين بالذات

يا بدر جبته بالتعب والجداره

وكتبت لك في دفتر المجد صفحات

يستاهل التكريم من عز داره

يستاهله عبر الصحف والمجلات

رجل كريم وموقد دوم ناره

ما هي غريبه من رجال الوجاهات

نسله تميمي نعم نسل الحرارة

أهل السيوف المرهفات الصقيلات

ياما خذو بالهجن جوله وغاره

أهل الشجاعة يوم كسب المغيرات

يا بدر تشبه بالرفاع الزباره

رأسك رفيع وهامتك بالسماوات

واطلب من الله بقدرته واقتداره

يعود فوزك بالسنه عد مرات

شعري كتبته فيك ما هو خسارة

قصده تختم بيوته على آت

شاعر وقدم لك جميع اعتذاره

عجزت بيوته تاصفك عبر الأبيات

الله يحفظك ما تذوق المراره

ويحفظ حلالك من عيون حسودات