يا مرحبا وأهلاً هلا يامسى الخير

أهلاً في ها المس­ا الل­ي تمنيته

هذا المساء يا ميرنا عندنا غير

نيابةٍ عن صاحب البيت في بيته

جتك التحية ما به إسراف ولا تبذير

ولو زدتها مثله فلا أقول حييته

اشهد شهادة ما به فيك تزوير

أغلى من الدنيا ومن حيه ومن ميته

أقولها يا سيدي يا سيدي أنت يا أمير

يا للي فهقت ضلوع صدري واستحليته

حبك تفجر داخل القلب تفجير

وأنا اتمنى أموت من عرقٍ سكنته وتليته

هذي ايباتي سقتها لك طوابير

وأنا الجندي اللي نظامي توليته

بيتٍ على راسك يصب المعاطير

وبيتٍ يشيلك لو بطيب رجلك توطيته

وبيتٍ فرشته لك سوات النواوير

وبيتٍ تلحفته والبيت الآخر تغطيته

أنا شاعر ولكن بالشعر يا سيدي تقصير

تعجز أبياتي لا مني يمثل شرواك خصيته

يضيعن القوافي فيك ويضيع الشعر التفكير

لو أني بالجزل جيتك وعلى القيقان شديته

قصيدي ما يكفي لو نثرت القافية تنثير

ولا يكفي لو إني قلت يا ليتي ويا ليته

أنا حبي لك بقلبي وصعب أًصوره تصوير

لو افتح صدري وقلبي ماظن يامير رديته

على الوريد آل سعود كتبه الله بلا تعبير

وعلى الشريان فيه اسمك بقلب الحب خطيته

عبد العزيز ابن ماجد ولا تحتاج لك تدوير

امير بالكرم معروف وبين الناس له صيته

سموح الطبع متواضع ولا تقوى على التغيير

خلقك الله كذا طيب ومن يزعلك أرضيته

بشوش الوجه متبسم تحير من يجي تحيير

ندي الكف الخير مع الزهاد عديته

على غيرك اقول الرِس وعليك مشبهك بالبير

سرابٍ غيرك مقفي وأنا من ماك جميته

يبان الدين في وجهك وعلى فعلك بها التأثير

أنا لو شفت لك صوره من أقصى القلب حبيته

ولي قصة مع الدنيا غريبة مالها تفسير

غير إن الله جمعني بك عقب ما صمت له وصليته

ودعيت الله يوفقني بلا صده ولا تأخير

وقبلها الله ووفقني بحلمٍ كم تمنيته

وتسع شهور واسب له على الرحمه والتيسير

واقول يا الله يا رازق تجيب اللي تحريته

وبوقت المساء جاني وتحريته بوقت عصير

صغيرٍ بشروني به وأنا بالحال تلقيته

وأنا من قبلها حالف علي الحلف والتنذير

على اسمك ناوي اسمي واحلم يوم ناديته

وصدفه وأنا بقربك رفعت الخط بالتبشير

سمعت اللي يقول ابشر وبعد الخط صكيته

عرفت إن الولد جاني وجيتك بالجناح أطير

ولا قصرت يا سيدي على اسمك قمت وسميته

على اسمك ياطويل العمر وغيره ماأبي تبرير

وعلى اسم العوذ زودها ولي يمناك مديته

قبلت اسمك لجل إنك أخذت القدر والتقدير

وقال العود لي تسلم طريق العِرف ما اخطيته