موقع الشاعر حمد العليان - قصائد

زوار اليوم: 34
إجمالي الزيارات: 57606

الفياقرا

يا راكب اللي صممت وسط برلين		لجل الملوك اللي رفيعٍ مقامه
هي مركب اللي يملكون الملايين		أهل السمو وأصحاب ذيك الفخامة
جتنا من الألمان ما هي من الصين		خضر العيون اللي صعيب كلامه
من مصنع المرسدس له عدت سنين		تفرض على كل الوجود احترامه
تجبرك لا شفته تسب الملاعين		والمصنع اللي صممه واهتمامه
هي صيحة العالم بتسعة وتسعين		يوم العرب ترقد وتعشق منامه
نفخر بصنعتنا من الصوف والطين		ونصف العرب يسكن نسايج خيامه
والعالم الغربي تقدم إلى وين		وحنا نداري روسنا كالنعامة
لو نصنع الغترة نبي بس عامين		والغرب يبني ناطحات الغمامة
وجتنا الفياقرا في ثلاثين تشرين		أهلاً بها مليون وأهلاً بعامه
والآن حنا بأربعة بعد بعد الألفين		وهي تمتع بيننا بانسجامه
كنه عروسٍ ماليٍ وجهه الزين		ومن الذهب حطوا عليها ألف هامه
يا لعن أبو من صمموها الشياطين		في صنعها حازوا فنون الزعامة
خضر العيون اللي كما طلعة التين		وروسٍ سليمه ما شكت للحجامة
أولاد هتلر ما هم أولاد مسلين		ما قصروا أهل الفكر والفهامة
جابوا لنا المرسدس وبالصنع وافين		ما قصروا بالشكل ورزت قوامه
وجه الفتاة اللي رت بالفلبين		أم العيون اللي بهن الوسامه
تهوي كما هوية فرخ الشياهين		لا شافت الصيدة تسبق جهامه
شكل انسيابي والصداديم فلين		خلفه حديدٍ يا قوي اصطدامه
دفرنسها والقير طبق الكوارين		وحتى المكينة لو بغيت انقسامه
ستة سلندر أو ثمانٍ على حين		حسب الظروف اللي توقف أمامه
اليا استغل ماطورها بالصلنصين		نسمة هبوب من شمال المنامة
من خلفها فتحة وساع الشكامين		ما تشكي الضيقة وعطل الكتامه
وفتحة سماها من زجاج السلاطين		لا سكرت يا كود فك التحامه
وتبريدها عالي كما ثلج بكين		خطرٍ يصيبك بردها بزكامه
وفتحة مسجلها على اللمس باللين		رادو ودسكٍ يعجبنك انغامه
شاشة وكمبيوتر وتلفاز تلوين		وجهاز هاتف مع وسايل سلامه
وطبلونها يعطيك بالليل لونين		في نصف دوسه ما تحسب أرقامه
وطبلونها بالرقم ميتين وستين		واسئل هل الردار وأهل الغرامه
لا مرت العسكر وهم بين جسرين		بين القصيم وبين خط اليامه
ما ميزو شكله ولا هم دارين		كلٍ يقول لصاحبه ابك علامه
البيج داخلها كما ورد لورين		تسطع كما لون البدر في تمامه
ولونه سماوي كنها بحر قزوين		وجلد المراتب غالي النوع خامه
ولا من فتحة أبوابها كل الإثنين		من نفسها تربط عليك الحزمه
ومفتاحها بصمة بروس البنانين		تفتح بلمسة صاحبه في بهامة
والجنط امنيوم والكفر جا بتأمين		ما جا العقيل ومصنع اليوكهامه
من وارد الجفال نعمٍ ونعمين		هاك الرجال أهل الكرم والشهامة
ما فكروا بالجمس وإلا الستروين		جابوا الرجال أهل الكرم والشهامة
اللي كما وردة نفل وفتحة زين		أو يد عروسٍ وسط كفه خزامه
إن جيتهم تطلب غرض ما قيل بعدين		وكالةٍ لبت جميع التزامه
يوم الطلب من غيرهم بعد شهرين		إن جازلك وإلا مع السلامة
جفال حازوا بالتعامل وسامين		وسام خبرتها وسام انتظامه
يستقبلونك مرحباً ألف وأهلين		على الكنب تجلس وجنب الرخامه
على يمينك ضابطٍ شال تاجين		وعلى يسارك تاجرٍ له مقامه
ما هو طابورٍ تنتظر فيه وقتين		بين الزيود وبين راعي البجامه
أحدٍ يبي بوجي والاخر بليتين		وعمال هندٍ عاملوك بغشامة
اللي عليهم من الوسخ فوق طنين		ما غير يهز بهامته من جلامه
أنا كسير وضربتي بالجناحين		ما غير أقلب سبحتي والعمامه
ودي عليها اركب عساها تسلين		عن الهموم اللي بقلبي زحامه
والله لولا الخوف والخوف والدين		واشره على نفسي وأخاف الملامه
لا سطي على ابن خضير والعشر وعشرين		واجمع فلوسٍ يوصلني زمامه
لكن ثمنها بالجنية الاسترلين		وأنا رصيدي في ريال الظلامه
يا لعن أبو حسابٍ وراعيه مسكين		لا شافها قامت تراجف عظامه
لكن على الله قولوا آمين آمين		يقوم حظي مثل راع الثمامه
واركب على اللي كنها اف خمسين		في يد طيارٍ نشأ في تهامه
والهرج زبده وزبدته بالنياشين		وأنا قصدت وزبدتي في ختامه
جعله تحقق ذيك الأحلام هالحين		وكأنه تحقق ذاك يوم القيامة