البارحة في خاطري رج محسوس

حسنٍ يرج القلب ­مليون رجاج

من زمرت وسط البلد زمرت السوس

اللي على جيب مصندق كما الحاج

أبيض ربع كله على بعض مكبوس

راعبه من بد المخاليق هلباج

ما يركبه غير المصاغير ونجوس

اللي يبون الكلي بالرأس وعلاج

واللي بهم نفصٍ من سنين مغروس

واللي قفل عقله من سنين مزلاج

يصيح مصدر لوحت الجيب قابوس

مصدر خليجي لوحته زرق ونتاج

وقامت تصيح أمه على أبوه وتحوس

وهو لها يا ناس بالدوم محتاج

وتلبس له الضيق من الزين ملبوس

وتزيد بالكحله وعلى الخد مكياج

لينه تلين النفس بالشيك وفلوس

أحدٍ ولد تاجر واحدٍ شكى داج

أهل الفلايح تتعب الوقت وتروس

وأهل الوظايف حطوا القصد مخراج

وسمع شروط الربع والشرط مدروس

حب وحلاوة وعلكت البنت والكاج

وقصت كبوريا واضحة بأسفل الروس

تشبه كما زرعٍ رعت فيه الأنعاج

وبمقدمه شعرٍ كما شك طاووس

لا هبته ريحٍ تكسر كما الساج

وصفارتٍ تصفر إلى زاد بالدوس

بمخيله يلحق مع الجو ميراج

وبكل المطاعم بطنه اليوم متروس

اكله من المشوي على الفرن والصاج

بالحي مشغلنا وبالليل بطعوس

وبين الشوارع عادته دوم دواج

أسبوع في بيته وأسبوع محبوس

وقسايمٍ تملى مع البوك الأدارج

ما هي غريبة ينقلب دون ملموس

وما هي غريبة يتقلب دون بطناج

ويصبح على الوالد كما حلم كابوس

والوالد المسكين منصاب بزعاج

إن ازعل الحرمة بقى شبه مضروس

وإن أزعل المسكين له يوم يحتاج

والشكوى لله راية اليوم مفروس

ماله مع المسكين يمه منهاج

واختم كلامي عد ما نام منعوس

وعداد ما مشت من السفن الأمواج

على النبي صلوا عدد دق مجروس

وعداد مالف الحرم محرم وحاج