يا حوض جيتك ناوي اليوم اعزيك

قرّب يجيك الم­وت حان ارتحالك

من يوم شفنا لابس الكاب راعيك

مدري وش اللي غير اليوم حالك

أبو سبيبٍ كنها شكت الديك

يمشي وكنه موردك للمهالك

إن كان ذا حالك فحنا نخليك

عقب الربع قالوا ترانا رجالك

وعقب الصغاير يلعبون الشرابيك

واليوم فوق الحوض عقب الكدالك

ما بقي إلأ يقلبونك تماتيك

ويبدلون المرتبة بالمدالك

ما دام حطو لك جنوط وسراميك

اصبر تحمل كل شيٍ ينالك

ماهي غريبة لا ولا فيه تشكيك

تمشي ورايك ضايعٍ بالمهالل

يا للي ركبته وش تبي بالمهاليك

غلطان أبوك اللي رضى وشترالك

الجيب ما هو لك ولا هوب باغيك

إن قيل رد البوش ضاعت حبالك

لا صار جو الب يجرح ويؤذيك

خله يجي قرمٍ يسوقه بدالك

ما دام طوقك مرتفع عن علابيك

وأبوك زوّد بالنعومه دلالك

عز الله إنه ما قدر يوم يربيك

ولامسكك نصب المساحي بشمالك

الجيب ما لك به قصارٍ خطاويك

حدك إلى الصفراء وهذا مجالك

لمّع وضلل صافيات الشبابيك

وليفارق الفيري مع الوقت بالك

ولا جت دروب العسر بانت مواريك

تاقف على الشارع وتنشر خمالك

عصا الدبل ما تعرفه والمكانيك

وتخاف لا شفت المرافع قبالك

اسمع كلام اللي نوى اليوم يوصيك

أوصى وعن دروب المعاسير شالك

الجيب ما هو للضعوف المهاليك

يا مفارقٍ سلمٍ لعمك وخالك

خلك على ركب الصغار وعروايك

لا عاد تركب فوق حوضٍ حلالك

ولا نشرنا من خفايا بلاويك

لين ايتبرا الجيب عن سود فالك

الحوض ما هو للنواعم شراويك

الحوض لرجالٍ تعرف المسالك