يا أهل الكوامري ما خطرتو على البال

بأفعالكم صار­ الحيا دوم منزوع

يا قل ما فيكم مع الوقت رجال

يا أهل الكوامري والمكاسيم والربوع

ويا كثر ما فيكم نواعم وهزال

تبادلون القلب الأحمر مع شموع

وكلٍ ورى الموضه دفع غالي المال

ولجل التنعم غالي المال مدفوع

يا للي على خدك تلثمت بالشال

ومن فوق رأسك تلبس اليوم قبوع

وتنقش على خدك رسم حبه الخال

ومحمرٍ خدك كما خد ملفوف

ومن طول طوقك لا تلفت تننغال

والكم نازل تحت أصابعك بالبوع

والثوب ضيق تحت الأقدام بسبال

من زود ضيقه بان ردفك مع الكوع

ومخصرٍ ثوبك وعلى الناس تختال

وثوبك من الخام الملمع ومشموع

وليا مشى غصنه تكسر وميال

وخطرٍ على ممشاه يا ناس لا يموع

لا ترتفع مرجعك بنشر وزبال

وهذا الغرور اللي بالأفكار مزروع

ولا تفتخر مرجعك خريج الأنجال

تنجح ولو ما جبت يا لهيس مجموع

أبوك في سوق المقاصيص دلاّل

وأختك تقصد وأنت ميت من الجوع

بين الشوارع عادته دوم جوال

يوذي بوقتٍ فيه سجاد وركوع

يدور بالشارع ودايم بهلحال

بالكبرى اللي صار بالشرق مقطوع

ما يلبسون الثوب وشماغ وعقال

وكلٍ بلبسه بين الأصحاب مخدوع

الجنز ملبوسه وخواتيم وبدال

وقبع من جلود الخنازير مصنوع

وخطرٍ يعلق بأسفل الصدر سلسال

مادام مكياجه على الوجه مطبوع

بيد الخدم منم صغرته دوم ينشال

ويومٍ كبر مع سايق البيت مسبوع

وليا زع لفظه بجلدي وجنجال

يومٍ مع الوالد ومع السايق سبوع

ولا تسألن من وين جونا هالأشكال

مادام لا صافح شكى عشرة ملوع