يا الله يا فارج عن النفس الأخطار

تحمي وطنا من رعاعة وطغيان

وتحمي مشاعرنا من نفوس الأشرار

اللي يشوفون النصر بقتل الإنسان

ويتلذذون بشوفة الناس بأضرار

وبعيونهم عن شوفة الحق عميان

اسرارهم عفنه ويا هي من اسرار

لغزٍ محير كل صاحي ومرضان

تقتل اخوك وتقتل الصحب والجار

وتقتل بري وتعدمه دون برهان

وش ذنب ها الطفلة مع الناس الأبرار

وش ذنبها تقتل بلا ذنب وجدان

تقتل وهي بين المباني والأسوار

ارخصتو أرواح البشر دون حسبان

ايتمتو أطفالٍ كما ورد وازهار

أطفال الشهيد اللي رحل أمس فرحان

وغيره كثير من العساكر والأنفار

راحو ضحية لفعلت افلان وفلان

في حجة انك ناوي الغرب الأقذار

ولا بحجة من يسمى والإيمان

جبتولنا في فعلكم وصمة العار

وحنا أهل دين السماحة والإيمان

دين الإسلام اللي على صاحب الغار

دين الشريعة دين سنة وقرآن

من يقتل المسلم لا ذنب كفار

ومرد المرجفين امثالكم دوم خذلان

من وين جتنا زمرت الشر بافكار

ومن وين جونا هالخوارج بالأديان

يا شعب يا سعودي يا شعب يا حرار

كله ولا كله شهامة وشجعان

لا تلتفت لا تستمع بعض الأخبار

مثلك جبل ما هزته ريح الأزمان

توحدو بالصف اكبار وصغار

حنا سفينة والفهد دوم ربان

ضد الخفافيش اللعينة بالأوكار

اللي تبيكم ما تعيشون بامان

يوم انكشف عن فعلهم غيم وستار

صارو على وضح النقا دون تبيان

صوت المشايخ كلهم شجب ونكار

وافتو وقالوا كلهم صف عدوان

من ينتحر ماله جزء غيرها النار

هذا جزا فعله جحيمٍ ونيران

يا خوي يالجندي يا الطايع البار

رمز الولا والأمن في كل الأوطان

فديت دينك والوطن باغلى الأعمار

أنا شهد إنك موشح الراس تيجان

لا رحمت الله من رحم شخص جزار

ذبح الأودام عنده من اغلى الأثمان

تمت وصلى على خير الاخيار

محمد اللي بين الدين بإحسان